Wednesday, August 12, 2009

Prashant's Story - In Hindi

Prashant (Asli naam nahin) parhai men bahut achchha tha. Apne school tatha college ke poore vidyarthi jeevan men woh hamesha apni kaksha men pratham ata raha aur usko hamesha koi na koi chhatravritti milti rahi, zila star par, rajya star par athawa rashtriya star par. Apni school ki shiksha poori karne ke bad woh desh ke sabse sammaniya engineering college, Bhartiya Praudyogiki Sansthan, Kanpur (IIT Kanpur) gaya, Computer Science men Engineering ki degree hasil karne ke liye. IIT men bhi woh bahut achchhe ank lekar pas hua aur phir usne pravesh liya Bhartiya Prabandhan Sansthan, Ahmedabad (IIM Ahmedabad) men, management men snatkottar(post garduate) upadhi prapt karne ke liye. Woh abhi pas bhi nahin ho paya tha ki usko ek bahurashtriya company men oonche vetan par desh ke ek mahanagar men bahut achchi naukari mil gayi. Kitna bhagyawan tha woh, hai na? Chaliye aage parhen aur dekhen, kya sachmuch!

Ishwar ne Prashant ko yeh sab gun to awashya diye the, lekin bechare ko janm diya tha ek samlaingik ke roop men. College ke pahale hi varsha men usko apne ek sahpathhi se pyar ho gaya. Uske sahpathhi ne ek din usse ek chumban dene ka anurodh kiya. Prashant ne apne mitra ka, jo ek bahut sundar larka tha, anurodh to mana hi, sath hi apne hridaya men uske liye prem ki ek chhoti si lau bhi prajjawalit ki, jo nirantar valvati hoti gayi jaise jaise unke sharirik sambandh pragarh hue, aur lagbhag 6 mah ke samay men jab unke sambandh charam sima par pahunche, Prashant apne mitra ke prem men akanthh doob chuka tha. Aur uska mitra? Usko to Prashant se usi samay pyar ho gaya tha jab usne Prashant ko pahali bar dekha. Ek doosre se ek pal ke liye bhi door rahane men asamartha, woh dono do sharir lekin ek jaan ban gaye. Hamesha ek doosre ki sahayata karne ke liye tatpar, dono pati-patni ki tarah rahane lage. Warden se anurodh karke unhone apne kamre bhi badal liye jisse un dono ka kamra ek hi ho gaya. Agar unmen se koi kabhi bimar ho jata to doosra uski poori dekhbhal karta, chahe iske liye use poori raat hi kyon na jagna pare. Prashant apne mitra se parhane men achchha tha isliye woh parhai men uski madad karne laga jisse ki uske mitra ko bhi bahut achchhe ank prapt hoone lage. Prashant ke mirta ne prashant ko scooter chalana sikhaya. Sankshep men kahen to woh dono ek doosre ke liye sab kuch ban gaye. Un dono ki ayu us samay karib 18 varsha ki thi.

Kishorawasta men bahut se larkon ko sharab peene ki aadat par jati hai. Unki kaksha ke bhi bahut se larkon ko yeh aadat par chuki thi. Ek din Prashant ne apne mitra ko bhi sharab peete hue dekha. Yeh dekhkar Prashant bahut naraz hua aur usne apne dost ko bhir kabhi sharab na peene ki salah di. Uske dost ne aisa vayada bhi kiya, lekin kuchh din bad usne phir apne mitra ko sharab peete deekha. Is bar Prashant ne apne dost ko saph shabdon me chetawani di ki agar us din ke bad usne ek bar bhi sharab ko hath bhi lagaya to woh uske sath apne sare sambandh tor lega. Isse uska mitra sahi raste par aa gaya aur uski sharab pine ki ichchha adat men badalane ke pahale hi samapta ho gayi. Cigarette pine ki adat ke sath bhi aisa hi hua aur Prashant ne apne mitra ki yeh adat bhi nahin parane di. Prashant ke jeevan ke we sabse sukhi din the athawa, jaisa ki Prashant ab kahata hai, sirf wahi din the jab Prashant ne jana ki jeevan kya hota hai. Apni zindagi ka baki samay Prashant ne jaise-taise kata hai, athwa kat raha hai.

Engineering ka degree course panch varsha ka tha. Antim ek varsha Prashant ke liye bahut kashtadayak sabit hua. Woh sochane laga, kya hoga jab woh dono pas ho jayenge. Kya usko apne sathi se alag hona parega? Yeh vichar hi uske liye atyant kashtadayak tha. Woh tarah tarh ki yojanayen banane laga. Kya un dono ko ek hi shahar men naukari mil sakti hai? Han, kyon nahin. Sirf unmen se ek ko shuroo shuroo men thori ghatiya naukari se santushta hone parega. Yeh koi bari samasya nahin thi. Lekin uske mitra ne samjhaya ki isse koi phayada hone wala nahin hai kyonki naukari lagane ke turant wad hi un dono ke mata-pita unko shadi karane ke liye majboor karane lagenge aur woh dono ek sath ek hi ghar men nahin rah sakenge. Phir kya kiya jaye? Kya woh dono apne apne gharon se bhag jayen aur kisi anjan nagar men jiwan shuroo karen? Lekin iska artha tha ki woh dono apne man-bap ke liye mar gaye. Anta men Prashannt ne sujhaya ki thheek hai agar dono ke liye sath rahana sambhav nahin to woh dono alag alag hi rahenge lekin jivan bhar avivahit rahakar ek doosre ke prati wafadar rahenge aur jab kabhi sambhav hua milenge. Akhir kuch samanya pati-patni bhi to naukari ya vyapar jaise karano se alag alag shaharon men jeevan yapan karaten hain. Lekin Prashant ke mitra ne kaha ki yeh vyabharik nahin hai tatha samaj aur parivar ke log unhen aisa karane ki ijajat nahin denge. Prashant ki koi bhi yojana safal hoti dikhayi nahin de rahi thi.

Samay bahut teji ke sath beet raha tha. Jab un dono ki varshik pareekha ko sirf 6 mah rah gaye to Prashant phoot-phoot kar rone laga, kabhi akele men to kabhi apne dost ke samane. Uska dost usko santwana deta tha - Yeh to thhik hai ki un dono ke liye sath-sath rahana sambhav nahin hai lekin iske vabjood woh dono jiwan bhar sachche mitra bane rah sakte hain, patron ke dwara ek doosre ke sampark men rah sakte hain, ek doosre ki madad kar sakte hain, aur jab kabhi sambhav hua to mil bhi sakte hain. Lekin Prashant ko yeh sweekar nahin tha. Usne socha - Jab uske mitra ki shadi ho jayegi to ek larki ko uski dhrmapatni ka sthan milega aur Prashant ko kiska sthan milega? Ek rakhail ka? Kadapi nahin? Agar uski vasana itni hi barha gayi to woh sarak ke kisi bhikhari ko paise dekar apne sharir ki bhookha mita lega lekin apne aap ko ek rakhail ka darja dena kabhi bardashta nahin karega. Agar wooh apne mitra ka sujhawa maanta hai to use iske sath hi ek pratigya bhi karni hogi ki woh jivan men phir kabhi apne mitra se nahin milega kyonki agar woh mila to uske sharir ki chah usko apne mitra se door nahin rahane degi aur agar uske mitra ne uska nakhoon bhi chhua to usi kshana(moment) Prashant apni nazaron men gir jayega, uska sharir ganda va maila ho jayega. Kya phayada hai aise sambandha rakhane ka jisme usko aisi kathhor pratigya karni pare?

Jab unke bichharane ko kewal ek hi mahina rah gaya to Prashnta ne apne aapko iske liye taiyar karna shuroo kar diya. Usne apne hriday ko patthar ki tarah kathor bana liya, rona band kar diya, aur apne aapko poori tarah parhai men vyasta kar liya. Aajkal woh apne mitra se bahut kam bolta tha. Unke sharirik sambandh bhi lagbhag samapta ho chuke the.

Jab vidai ka samay aya to Prashant ke mitra ne usko akhiri bar apni vahon me lekar dhire se uska chumban liya. Woh sambandh jo ek chumban se shuroo hue the aaj ek chuman ke sath hi unka anta ho raha tha. Prasahnt ki ankhen barasana chahati thin lekin usne kathhorata se unko rok liya. Usne khali khali nazaron se ek bar apne sathi ko dekha aur phir woh usse alag ho gaya.

Prashant jab apne ghar pahuncha to woh apne hosho-hawas men nahin tha. Woh kya kar raha hai, kya kah raha hai, kahan ja raha hai iska usko kuchh hosh nahin tha, jaise koi adrishya shakti use khinch rahi ho, mano kisi ne use sammohit kar diya ho. Uske ghar par khushi tatha ullas ka vatavaran tha. Prashant Engineer ban kar jo lauta tha. Uske mata-pita, bhai-bahan, mitra tatha parosi sabhi bahut khush the. Sab kushiyan mana rahe the. Us khushi ke alam men kisi ne nahin dekha ki Prashant par kya gujar rahi thi. Jab koi Prashant se hansi-majak karta to Prashant bhi muskarata, jab koi chutkula sunata to Prashant bhi hansata, lekin kisi ne mahsoos nahin kiya ki Prashant ki muskan phiki thi aur hansi khokhali.

Prashant ka ab tak ka jivan to aram se gujar gaya tha lekin ab use apni pahar si jindagi mushkilon ka samna karte hue katni thi. Woh abbi poore 23 varsha ka bhi nahin tha lekin uske liye jivan men koi khushi baki nahin bachi thi. IIT men woh apne mitra se ek pal ke liye bhi alag nahin rah pata tha. Yahan tak ki woh chhuttiyon men ghar tak ana pasand nahin karta tha. Woh apne mitra ke sath hostel men hi rahata tha jab tak ki chhuttiyan kafi lambi na hon. Prashant soch raha tha ki ab woh apna sara jivan apne mitra ke bagair kaise gujarega. Apne mitra ke bina kaisa hoga uska jiwan? Uska dam ghut raha tha. Usko atyadhik pira ho rahi thi. Woh pani se bahar nikli hui machhali ki tarah tarap raha tha. Pichhale ek sal men bhi usne bahut dukh jhela tha lekin tab woh apni parhai men apna dukh bhula leta tha. Ab to uske pas parhane ke liye bhi kuchh nahin tha. Uske sathi ka chehra hamesha uski ankhon ke samne rahata. Ek kshana (moment) ke liye bhi woh usko bhula nahin paa raha tha.

Prashant ke nagar ke antim chhor par ek chhoti si nadi bahati thi. Prashant roz shamko us nadi ke kinare jakar ghanton wahan baitha rahata. Woh apne mitra ke sath gujare hue dino ko yaad karata aur apne bhavishya ke ware me sochata. Sochate-sochate uski ankhen aansuon se bhar jatin. Us samay wahan par koi nahin hota tha isliye Prashant apne aansuon ko rokne ki koi cheshta nahin karata tha. Prashant ki ankhon ka garam aur nadi ka thhanda pani sath-sath bahate the. Jab bahut andhera ho jata to woh laut parata. Kabhi kabhi woh sochta agar woh nadi men kood pare to! Ek pal men uske sare dukhon ka anta ho jaayega. Lekin uske mata-pita ka kya hoga jinko Prashant par garva tha? Kaise vardashta karenge woh apne jawan larke ki maut ka dukh? Aaj jo kuch woh bhugat raha tha, phir uske mata-pita ko bhugatana parega.

Prashant ne teen mah atyant kasht aur pira men gujare. Usko thora sukoon milta to kewal us samay jab uske pas uske mitra ka patra ata ya woh usko ptra likh raha hota. Woh karib 15 din men ek bar patra likhate the. Adhiktar woh us samay akhabaron men nikal rahi naukari ke vigyapanon ke bare men likhate the.

Aur tab Prashant ko IIM men pravesh mil gaya. Yeh uske liye bahut rahat ki bat thi. IIM men woh apne aapko vyasta rakh sakega, usne socha. Aur woh kabhi kabhi apne mitra se mil bhi sakega kyonki IIM men usko alag kamra milega. IIM join karne ke bad jo pahala kam Prashant ne kiya woh tha apne mitra ko bulane ka. Jab uska mitra aya aur usne Prashant ko apni wahon men liya, to Prashant aur uska mitra dono hi rone lage. Dono ek doosre ko chupane ki koshish karte lekin khud rote jate. Jaldi hi dono ko samajh aa gaya ki apne ansuon ko rokna unme se kisi ke bas ki baat nahin thi aur isliye un dono ne yeh koshish band kar di. Woh dono teen mahine se bhi adhik ke bad ek doosre ko dekh rahe the. Pahale kabhi woh itne samay tak ek-doosre se alag nahin rahe the. Unhen kitni hi baaten karni thin, kitna sunna tha, kitna sunana tha. Dono ek-doosre se kahana chahte the ki unke liye ek-doosre se alag hokar rahana kitna mushkil tha. Prashant ka mitra teen din tak Prashant ke sath raha. Iske baad Prashant har teen-char mahine ke baad apne mitra ko do-teen din ke liye bulane laga.

Ek baar Prashant ko apne mitra ka ek patra mila jisme usne likha tha ki uske mata-pita soch rahe the ki pas hote hi use koi achchhi naukaari mil jayegi. Lekin 6 mahine ke baad bhi aisa nahin ho paya tha aur isliye uske mata-piita ka vyabhar uske prati kathhor ho gaya tha. Bare hi marmik shabdon men uske mitra ne likha tha ki is sansar men Prashant ke alawa aisa aur koi nahin tha jo use pyar karta ho, isliye ya to Prashant uske pas aa jaye ya use apne pas bula le. Yeh parhkar Prashnat ko bahut dukh hua. Prashant janata tha ki uska mitra adhik bhavuk nahin hai phir bhi usne aisa patra likha tha. Iska artha tha ki sachmuch uska mitra sachmuch bahut pareshani men tha. Ah, Prashant jisko apni jaan se bhi adhik chahta tha uske liye woh kuchh nahin kar sakta tha. Prashant ka dil tarap kar rah gaya. Usne sirf apne mitra ko likha ki woh himmat na hare, aur apna dil chhota na kare. Ek Engineer ka adhik samay tak berojgar rahan sambhav nahin hai. Jaldi hhi usko koi na koi achchhi naukari avashya mil jayegi aur tab sab kuchh thheek ho jayega.

Agli baar jab Prashant ka mitra usse milne ke liye aya, tab Prashant ne dekha ki uske pas sirf ek jori hi achchhe kapre the. Usi shamm ko Prashant ne do jori sabse barhiya kapre kharidkar apne mitra ko uphar men diye. Uske mitra ko bara ashchrya hua kyonki pahale kabhi un dono ne ek-doosre ko koi uphar nahin diya tha. Uske poochhne par Prashant ne kaha ki woh dono ab bahut kam mil pate hain. Kahin tum mujhe bhhol na jao, isliye tumko yeh kapde de raha hoon. Jab kabhi tum inhen pahanoge, mujhe yaad karoge. Iske karan Prashant ko baad men thori si dikkat bhi hui kyonki Prashant sirf scholarship se hi kam chala raha tha, woh ghar se koi paisa nahin mangata tha. Ispar bhi Prashant apne mitra ko uphar dekar bahut hi khush tha.

Kuchh samay ke baad Prashant ko apne mitra ka patra mila jismen usne likha tha ki usko naukari mil gayi hai aur ab uske mata-pita ka vyabhar bhi uske sath achchha hoo gaya hai. Tab tak Prashant ki MBA ki degree bhi poori hone wali thi aur Prashant ko bhi naukari mil gayi. Ab Prashant bhi kabhi kabhi apne mitra ke paas jane laga. Woh har panch-chhah mahine par do-teen din ke liye ek-doosre se milte the.

Is prakar, IIT chhorane ke lagbhag 6 sal baad tak woh dono milte rahe. Prashant ke jiwan men agla mor tab aya jab usko apne mitra ki ek chitthhi mili jismen usne likha tha ki uska rishta taya ho gaya hai aur amuk tarikh ko uska vivah ho jayega. Prashant 11 varsha se apne mitra ke sampark men tha. In 11 varshon men se baad ke lagbhag 7-8 varshon se uska mitra usse kahata aa raha tha ki ek na ek din usko shadi avashya karni paregi. Doosri or Prashant kabhi is vastikvikta ko sweekar nahin kar paya tha aur hamesha apne mitra se jiwan bhar avivahit rahne ka anurodh karata raha tha. Ab samay aa gaya tha ki Praashant is vastivkta ko sweekar kare. Lekin Prashant ab bhi iske liye taiyar nahin tha. Prashant is baat ki kalpana bhi nahin kar sakta tha ki uska mitra kisi aur ki wahon men ho. Ye vichar uske liye atyant piradayak tha. Prashant ko samajh nahin aa raha tha ki woh kya kare. Usne patra ka jawab nahin diya. Kuchha din ke baad uske pas uske mitra ka ek aur patra aya jismen usne Prashant se yeh kahkar mafi mangi thi ke woh majboor hai. Prashant ne is patra ka bhi uttar nahin diya. Phir uske mitra ka teesra patra aya jismen usne likha tha ki halat uske kaboo se bahar hain aur isliye Prashant usko maf kar de. Prashant ne tab bhi koi uttar nahin diya. Phir uske mitra ke patra ana band ho gaye. Lagbhag 15 din gujar gaye. Prashant bechain tha. Akhir usne apne mitra ko likha ki woh usse milane aye. Prashant ka mitra uske pas aya aur ek saptah tak uske sath raha. Prashant ne usse vivah radda kar dene ko kaha. Uska mitra iske liye taiyar nahin tha. Prashant ne apne mitra ko dhamki di ki agar usne apna vivah radda nahin kiya to woh atmahtya kar lega aur uske mrit sharir par hi voh apne byah raha sakega. Anta men uska mitra raji ho gaya aur tabhi Prashant ne usko lautane diya. Yeh tay hua ki uska mitra larki walon ko ek anam patra likhega ki larke wale nichi jati ke hai aur unhone apni jati chhupi hai.

Jaisa taya hua tha uske anusar Prashant ke mitra ko har baat ki soochana Prashant ko barabar dete rahana tha. Lekin Prashant ko 15 din tak bhi apne mitra ki or se koi soochan nahin mili. Aur bhir Shadi ka din bhi nikal gaya. Uske mitra ne tab bhi Prashant ko koi soochana nahin bheji. Akhir Prashant ne apne mitr ke paitrak sthan jane ka nirnaya liya aur raat bhar ki yatra karke woh uske ghar pahuncha. Wahan jakar usko maloom hua ki uske mitra ka vivah ho chuka hai. Uske mitra ne usse adhik baat bhi nahin ki. Sirf itna hi kaha ki sari taiyariyaan poori ho chuki thin isliye usne kuch karana uchit nahin samjha. Poori tarah se toota hua Prashant bhagna hridaya waps laut aya.

Sooraj ab bhi duniya ko roshni de raha tha, nadiyan ab bhi apne meethe jal se sansar ki pyas bujha rahi thi, phool ab bhi khilkar sansar ki sundarata ko barha rahe the aur chiriyan ab bhi chahachaha-chahachaha kar duniya ko apne meethe geet suna rahi thin lekin Prashant ke liye sansar badal chuka tha. Toot chuki thi neh ki woh barik si dor jisse bandha hua Prashant apne mitra se 6 mah men sirf ek bar milkar bhi khush tha. Usne kbhi uf tak nahi ki. Kabhi ishwar se shikayat nahin ki. Parantu ishwar se Prashant ka itna sa sukh bhi deka nahin gaya. Aaj usne woh nazuk si dor bhi kat di. Ab Prashant duniya men bilkul akela tha. Ab sara jiwan is vishal sansar men woh akela bhatkega. Pyar ke ek-ek meethe bol ke liye taras jayega woh. Kya karata Prashant? Usne apne aapko kaamre men band kar liya aur sharab peena shuroo kar diya. Wohi Prasahnt jisne ek din apne mitra ko shrab peene roka tha aaj khud sharab pee raha tha. Usne apne daftar jana band kar diya. Uski sharab ki matra dinodin barhati gayi. Lekin sharab se usko koi phayada nahin ho raha tha. Ek kshana ke liye bhi woh apne mitra ko nahin bhula saka. Uska sundar chehra hamesha Prashant ki ankhon ke samne rahata. Prashant ke un dinon men uska koi sathi tha to kewal ek boorha naukar jo uske liye khana banata tha aur ghar ke doosre kam karata tha. Jab Prashant lagbhag do mahiine tak apne kam par nahin gaya to uski bahurashtriya company ki woh naukari chhoot gayi.

Prashnat ne lagbhag 6 mahine is buri halat men gujare. Woh apne paitrak sthan se bahut door ek dosre rajya men tha. Usne apne mata-pita ko kuchh nahin likha kyonki isse usko koi labh hone wala nahin tha. Ulte uski pareshaniya aur barh sakti thin. Use sawalon ke teero ki bauchhar ka samna karna parata - yeh kaise hou, tum abhi kya kar rahe ho, yahan aa jao, doosri naukari ki koshish karo adi adi. Lagbhag 6 mah ke baad uska dard kuchh kam hona shuroo ho gaya. Ab usne doosri kamon ki or dhyan den shuroo kiya. Sabse zaroori kam tha doosri naukari ki talash karana. Uski pichale char varsho ki bachat sharab tatha doosri zarooraton par khatma ho chuki thi. Usne naukari ke liye kooshish shuro kar di aur karib do mahine bad usko ek sarkari company men naukari mil gayi. Yeh naukari uski pahali naukari ke mukable kuch bhi nahin thi lekin Prashant ke pas ise sweekar kar lene ke alawa aur koi rasta nahin tha.

Yeh naukari ek aise shahar men thi jo uske paitrak sthan se kafi paas tha. Jab woh apni nayi naukari aur nayi jagah men vyavasthit(settle) ho gaya to uske mata-pita uske pas ane lage aur use shadi karne ke liye mazboor karane lage. Prashant hamesha saf mana kar deta tha. Woh kahata tha ki woh is bare men baat bhi nahin karna chahata. Lekin iske babjood, usne dekha ki dhire-dhire na kewal uske maan-baap, balki uske rishtedar, mitra, sahakarmi, parosi, tatha jise bhi woh is duniya men janta tha woh use shadi ke liye majboor karne laga. Jab bhi koi usse milne ata woh sirf uski shadi ki baat karta aur koi baat nahin. Aisa lagta tha ki duniya men logon ke liye uski shadi ke alawa koi vishaya tha hi nahin. Log kisi tarah mante hi nahin the. Prashant logon se rukhepan se pesh ata, kabhi-kabhi unka apman bhi kar deta, unko apne ghar se nikal jane ke liye bhi kaha deta, lekin bhir bhi log nahin mante the. Unka dhairya aparimit tha. Sansar men jis kisi ke bhi shadi layak larki thi, woh Prasahnt ke ghar aur daftar ke chakkar katne laga. Na jane kahan se unko uska pata mil jata tha. Prashant sabko mana karte-karte thak gaya.

Prashant ka swasthya pichhale aathh mahino men uski bigarti hui mansik dasha tatha atyadhik sharab peene ke karan kafi kharab ho gaya tha. Iske alawa, khana banana na ane ke karan woh khana bahar kisi restaurant men khata tha. Kai bar woh bazar jane men alas karta aur bhookha hi so jata. Iska bhi uske swasthya par asar para. Woh baht jaldi-jaldi bimar parne laga. Usko hamesha bukhar rahane laga. Kabhi-kabhi woh apne daftar men kanpane lagta aur uske sahkarmi usko tokte. Jab Prashat Doctor ke pas jata to woh usko dawai dekar kahate ki ise khali pet mat khana. Is karan Prasahnt kai bar dawai nahin kha pata kyonki na uska man khana bananee ka hota aur na hi bazar jane ka. Aur yeh samaya tha jab ki Prashant apne vivah ke bare men sochane laga. Uski dekhbhal karne ke liye kisi ki zaroorat thi. Shadi ke alawa aur koi rasta nazar nahin ata raha tha. Uske mitra ki shadi ko char saal beet chuke the. In chaar salon men usko apne mitra ki kabhi koi khabar nahin mili thi. Aur na hi uski ichchha thi ki ab jeevann men use uska kabhi koi samachar mile. Prashant yeh bhi janta tha ki ab use apne jaise aur koi mitra nahin milega. Ahir uske jaise log ssirf chahane bhar se thore hi mil jate hain. Uske jaise log to kahin dikhayi bhi nahin dete. Aur bhir aisa koi jo sara jiwan uske sath rahe. Usne yeh vastvikta bhi sweekar kar li thi ki ab use jiwan men kabhi sharirik sukh nahin milega. Kahin se koi sahayata ki asha nahin thi, koi sahara dene wala nahin tha aur na hi koi aisa tha jo ki usko sahi raasta dikhata. Aisi dasha men usne nirnaya liya ki agar ab uski shadi ka koi prastawa aya to woh na nahin kahega. Woh lagbhag das varsh se iske viruddha larta aa raha tha lekin ab woh pariwar, samaj taha apni paristhitiyon ke samne ghutne tek dega. Aur apni patni ke saath sharirik sambandh? Prasahnt ne socha liya ki woh uski khushi ke liye uske saath pyar ka natak kiya karega.

Prashant abhi thheek se nirnaya le bhi nahin paya tha ki kismat ne use ooopar amal bhi kar dddiya. Hamare samaj men shadi ke layak larkon ke liye itne adhik rishte milte hai ki isse pahale ki aap ek rishta dhoondhen aapko hazar mil jayenge. Uske mata-pita ek rishta lekar aye aur ek kamjor kshana men Prasahnt ne apne maun (silence) se apni sweekriti de di aur Prashant ka 'Vivah' sampanna ho gaya. Is prakar hui Prashant se apne jiwan ki sabse bari bhool. Aur Prashant ke dukhon ki ek nayi kahani shuroo ho gayi. Prashant apni patni ke saath pyar ka natak nahin kar saka. Ek stri(woman) ke sharir ki Prashant ko koi chah nahin thi. Use apni patni ke sparsh tak se nafrat thi halanki(though) uski patni bahut sundar thi. Uske shuroo karne ke pahale hi sab kuchh khatm ho jata tha. Usko paanch minute bhi nahin lagte the. Uske oopar yeh ek bojh tha. Woh raaton se darta tha. Shaan hoti aur woh sochata ki kash woh kahin bhag jata. Uske liye yeh balatkar se bhi adhik kashtaprad tha. Ek stri ke saath jab koi balatkar karta hai to use sirf woh kuch sahan karna parta hai jise woh pasand nahin karti. Lekin Prashant ko na kewal yeh sab sahan karna tha balki use khud yeh sab karna bhi tha. Kabhi-kabhi yeh sab karte samay use hriday men hoti apne mitra ki yaad aur aankhon men aansoo. Uski yeh sab karne ki aavritti (frequency) kam se kam hoti gayi. Shuroo-shuroo men saptah men ek bar, phir ek mah men ek baar, aur bhir kai mahinon men ek baar. Lekin is karan se Prashant ko paanch varsh men do santanon (offspring) ki prapti hui, pahale ek beti aur phir ek beta.

Prashant ki patni ne vigyan men snatkottar upadhi prapta ki thi. Woh meethhe swabhawa ki larki thi. Lekin ab uska swabhawa bahut kharab ho chuka hai. Uski manasik dasha bigar chuki hai kyonki use na to Prasahnt se pati ka pyar hi mila aur na hi sharirik sukh. Woh Prashant se har chhoti-bari baat par larti-jhagarti hai, uske oopar chillati hai, use aur uske ristedaron ko gandi-gandi galiyan deti hai, aur apne khud ke maan-baap ko bura-bhala kahati hai jinhone uski shadi Prashant ke saath kar di. Woh itni gandi-gandi galiyan bakti hai jinhen sunkar ek veshya ko bhi sharm aa jaye. Aksar woh Prashant ke oopar haath bhi uthha deti hai aur usko chanta tak mar deti hai. Prashant khoon ka ghoon peekar raha jata hai. Prashant sab kuchh sahan karta hai kyonki woh janata hai ki galti usi ki hai, use shadi karne ka koi hak nahin tha, usne apni panti ki jindagi kharab kar di hai. Usko sab kuchh sahan karna hi parega kyonki woh papi hai, kyoni uski adaten gandi hain, kyonki samaj usse nafrat karta hai, kyonki Ishwar ka kop uske oopar para hai, kyoni usko stri ki vajay purush ke sharir ke chah hai. Lekin kabhi-kabhi uska dhairya jawab de deta hai aur woh bhi apni patni ki tarah hi jor-jor se gandi-gandi galiyan dene lagta hai aur use peetne lagta hai. Aur tab woh dono kutte-billi ki tarah larane lagte hain. Unko is tarah larta dekhkar koi mazdoor ya bhangi bhi baunchak raha jayega. Woh ye sab apne bbachchon ke samne hi karte hai aur jab ki unke parosi bhi sun rahe hote hain. Unko is tarah larta dekhkar koi sapne men bhi soch nahin sakta ki woh dono hi itni oonchi shiksha prapta hain. Mamla tab jakar samapta hoota hai jab Prashat apne hathhon aur pairon se a pni patni ko maar-maar kar uska kachoomar nikal deta hai, woh rone lagti hai aur apne aapko kamre men band kar leti hai. Bachche buri tarah dar jate hain. Do-teen din tak ghar par khana nahin banta. Prashant aur uski patni dono hi bhookhe rahate hain. Bachchon ke liye pas ke ek restaurant se Prashant kuchh le ata hai.

Prashat ko apni patni se koi payar nahin hai lekin woh apne bachchon ko bahut pyar karta hai. Prashant kahata hai- samanya log apna pyar apni patni aur bachchon men barabar-barabar bante hain lekin mere hridaya ka sara prem mere bachchon par hi kendrit hai. Lekin iska uski patni par bahut bura prabhawa (effect) hua hai. Woh apne khud ke hi bachchon se jalne lagi hai kyonki unko Prashant se itna pyar milta hai aur use bilkul nahin. Woh apne bachchon ko aksar bina kisi karan ke peettee hai(beats) aur unko galiyan deti hai, woh unko khana nahin deti, aur unki parhai ka koi khyal nahin rakhati. Woh kahati hai jab koi uska khyaal nahin rakhataa to woh kyon kisi ka khyaal kare. Aksar jab Prashant office se lautata hai to dekhata hai ki uske bachche ro rahe hain. Wh usko batate hain ki unki maan ne unko buri tarah peeta hai aur dopahar ko khane ke liye kuchh bhi nahin diya. Woh raat ka khan bhi nahin banayegi kyonki usne apne aa ppko kamre men band kar liyaa hai. Tab Prashant apne bachchon ke liye khana banata hai. Woh khana banana nahin janata hai, sirf khichri ya daliya jaisi koi cheej bana sakta hai. Kabhi kabhi Prashant bhi bahut gusse men aa jata hai. Woh office se thaka hua lauta hai aur woh bhi bhookha hai. Office ki bhi apni samasyayen (problems) hoti hain. Unse bhi nibatna parta hai. Aur bhir ghar aakar roz yeh musibat. Woh in bachchon ke liye kuchh nahin kar sakta. Kisne unse kaha tha uske ghar men paida hone ke liye? Unka bhagya hi kharab hai to woh kya kare? Aur woh bhi apne bachchon ke liye khana nahin banata. Us din uske bachche bhhokhe sote hain.

Der raat ko jab Prashant ka krodh shant hota hai, to woh uthhata hai aur bachchon ke kamre men jata hai. Woh unko khane ke liye kuchha dena chahata hai, doodh garam karke unko pilana chahata hai. Lekin dono bachche gahari neend men hain, unko is samay uthhana thheek nahin. Prashant ka dil bhar ata hai. Uske bachchon ki kya galti hai? Unko yeh sab kyon sahan karana par arha hai? Woh apne bachchon ke pas unke bistar par baith jata hai, unke balon men apni ungliyan phirata hai, aur unko choomta hai. Phir woh apne aapko santawana (consolation) deta hai ki subah woh bahut jaldi uthakar bachcho ke uthane ke pahale hi unke liye kuchh bankar rakhega.

Prashant ki patni a pne hi bachchon ke prati itni kathor kyon ho gayi hai? Kyonki Prashant unko pyar jo karta hai. Agar jindagi ne Prashant ko kuchh diya hai to woh hain yahi bachche. We uske jeevan ki sabse bari nidhi hain. Woh unka munh (face) dekhkar kuch samay ke liye apne dukh bhool jata hai. Woh jab unhen apni god men leta hai to usko bahut khushi hoti hai. Prashant ki patni yeh khoob achchhi tarah janti hai. Prashat uska dushman hai. Hamen apne dushman par kahan var karna chahiye? Jahan woh sabse kamjor ho. Prashant ke bachche uski kamjori hain. Isliye bachchon ke prati nirdaya dikhane se Prashant ko sabse jyada chot pahunchegi. Woh kabka bhool chuki hai ki yeh bahi bbachche hain jinhen usne naun (nine) mahine apne pet men rakha hai.

Prashant ke bachche jinhen apni maan ka pyar nahin mil raha hai manasik roop se asamanya hote ja rahe hain. Unka sharirik vikas dheema hai aur woh parhane men kamjor hain. Itne medhavi pita ke bachche, haan (yes) weh parhane men kamjor hain. Weh apne papa ko bahut pyar karte hain, jinse unhen mann aur baap dono ka pyar milta hai. Lekin Prashant to unke saath sara din nahin raha sakata. Use daftar jaana hi parega. Bachchon ko to apni maa ke saath hi rahana hai jisse woh bahut darate hain. Prashant ke bachche jab bare hoonge to weh asamanya aur mansik roop se kamjor honge. Jab unka vivah hoga to unka parivarik jeevan asamanya aur dukhi hoga. Aur isi prakar pirhi-dar-pirhi parivar ke parivar barbad hote rahenge.

Iske liye kaun jimmedar hai? Prashant, jisko ek stri ke sharir ki koi ichchha nahin thi, jisko samaj ne jabardasti ek aurat ke saath bandh diya, aur jo apni patni ke saath pyar ka natak nahin kar paya? Uski patni, jisko apne pati se woh kuchh bhi nahin mila jo uska hak tha aur jo ardha-vikshipta (half-mad) ho gayi? Unke bachche, jinko kabhi maan ka pyar hasil nahin hua aur jo hamesha dare hue rahate hain? Kaun is prashna ka jawab dega?

Prashant ke pas jo kuch hai kya usko usi men khush nahin rahana chahiye? Kya usko yeh nahin samajha lena chahiye ki usko ab koi purush pyar karne ke liye nahin milega? Uske pas sirf apni patni hai. Woh usi ko pyar karne ki koshish koyn nahin karata? Woh oonchi shiksha prapt hai. Use apne parivar ko tootne se bachana chahiye. Prashant kahata hai - jeewan apne sathi ke chhote-chhote sukhon ke liye apne sukhon ko kurban karne aur ek doosre ke sukh-dukh men saath dene ka naam hai. Apni patni ke liye mere hridaya men aisi bhavnayen hain hi nahin. Muje na uske dukh me dukh hota hai, aur na uske sukh men sukh. Shyad sharirik akarshan aur ek doosre ke sharir ki chah jaroori hai. Iske bina prem nahin hota.

Agar Prashant apni patni se pyar nahin kar sakta to kam se kam use apna mitra to bana sakta hai? Jeewan-moolyon men dosti ko pyar se bhi ooncha sthan diya gaya hai. Dosti ki khatir to log apni jann bhi de dete hain. Prashant iska jawab is tarah deta hai - Dost woh hota hai jo hamare bare men sab kuch janata hai, jisse ham kuchh bhi nahin chhupate. Meri patni se to mera sab kuchh chhupa hua hai, mere vyaktitawa ki sabse bari baat, meri akankshayen, meri abhilashayen, meri vastavikta, kuchh bhi to aisa nahin jo usko maloom ho. Woh kaise meri mitra ho sakti hai.

Ab Prashant ke jiwan ne ek ganda mor le liya hai. Lekin isse pahale ki ham aap ko iske bare men batayen, ek aisi ghatna ke bare men likhana zaroori hai jo college men uske saath ghati thi. Tab Prashant kishoravastha men tha aur bahut sundar lagta tha. Uski kaksha ke 50 men se aadhe se adhik larke uske peechhe the. Lekin Prashant ko to apna jiwan sathi pahale hi mil chuka tha, isliye agar koi bhi larka uske saamne koi aisi-vaisi ichchha jahir karata to woh usko bahut buri tarah phatkarata tha. Shayad is karan se athwa waise hi, ek bar uski kaksha ke do larko ne uske saath balatkar karne ki koshish ki. Woh garmiyon ki ek sham thi aur hostel ke sab larke khelne ke liye bahar gaye hue the. Prashant ko khelon men koi ruchi nahin thi. Woh snangrih men phabbare ke neeche naha raha tha. Snangrih ki deewaren sirf karib 7 feet oonchi theen aur woh chhat ko nahin chhooti theen. Prashant ke sharir par koi bhi vastra nahin tha. Achanak Prashant ki kaksha ka ek larka snangrih ki deewar phand kar andar kood aya. Woh ekdam nirvastra tha. Usne Prashant se kaha ki woh usko apne saath sambhog karne de nahin to woh zabardasti aisa karega. Larka bahut lamba-tagra tha. Chhote kad aur duble-patle sharir ka Prashant kisi tarah bhi uska mukabla nahin kar sakta tha. Cheekhane-chillane se koi phayada nahin tha kyonki snangrih hostel (chhatrawas) ke mukhyya bhawan se bahut door, pandrah kamron ke baad ek bare kamre ke andar bane hue the. Is kamre ka mukhya darwaza us larke ne pahle hi band kar diya tha aur roshni bujha di thi.

Prashant ko kisi na kisi tarah se apni raksha karni thi. Woh larka anurodh karne se Prashant ke oopar koi daya karne wala nahin tha. Prasahnt ka mastishk tezi se kam kar raha tha aur aakhir usne bachane ka ek raasta soch hi liya. Halanki Prashant bahut ghabraya hua tha, phir bhi usne apne aapko sambhala aur larke ko samjhaya ki Prashant bhi uske saath sambhog karna chahata tha lekin snangrih men aisa karne ka kya phayada? Prashant ne us larke se kaha ki nahane ke baad woh khud hi us larke ke kamre men ayega. Aur Prashant ki chalaki kam kar gayi. Us larke ko Prashant ke oopar vishwas ho gaya aur woh jaise deewar phand kar aya tha waise hi chala gaya.

Lekin jaise hi woh gaya, Prashant ki hi kaksha ka ek aur larka jo pahale wale larke ki tarah hi hatta-katta aur lamba-tagra tha andar kood aya. Woh bhi poori tarah nirvastra tha. Use itna dhairya bhi nahin tha ki pahale wale larke se poochh leta ki woh apne maksad men kamyab hua ki nahin. Isliye Prashant ne wohi chalaki phir dohrayi aur abki baar bhi apni raksha karne men kamyaab ho gaya. Jab yeh larka ja raha tha, to buri tarah dare hue Prashant ne usse poochha ki kya koi aur larka bhi apni bari ka intzar kar raha hai. Us larke ne kaha ki nahin, aur tab Prashant ki jaan men jaan ayi.

Jab Prashant apne kamre men lauta to woh dono larke lagbhag do ghante tak Prashant ke kamre ka darwaza khakhatate rahe. Jab Prashant ne apne mitra ko yeh ghatna batayi to usne salah di ki Prashant sham ko thori der se nahaya kare jab sare larke khel kar wapas aa gaye hon. Usne Prashant ko yeh bhi salah di ki woh apne saath apni suraksha ke liye kapre silne wali ek sui bhi baathroom le jaya kare. Lekin Prashant aur uske mitra dono ne hi is ghatna ki shikayat warden se nahin karane ka nirnay liya kyonki isse Prashant ki bhi badnaami hoti.

Aaiye ab aapko Prashant ke jiwan ke us mor ke bare men batayen jiski ham charcha kar rahe the. Ek din Prashant ne ek patrika men parha ki uske nagar men do aise park hain jahan samlaingik milte hain aur apne liye saathi ki talash karte hain. Prashant ne bhi un parkon men jane ka nishchaya kar liya. Agli bar jab uski patni mayake gayi aur woh ghar men akela tha tab woh patrika men bataye gaye ek park men gaya. Pahale din usne ek 20 sal ke larke ko akele baith kar ek akhbar parhate hue dekha. Prashant usko bari der tak dekhata raha lekin uski himmat larke ke adhik pas jane ki nahin hui. Us larke ne bhi Prashant ke oopar dhyan nahin diya. Kuchh der ke bad ek aadami aya. Woh larke ke pas baithh gaya. Usne larke se uska akhabar manga aur parhane laga. Thori der ke bad woh larke se baat karane laga. Phir woh dono uthhakar park ke wahar jane lage. Aadami ne apna hath larke ki peethh par rakh diya. Kuchh der tak woh dono idhar udhar ghoomate rahe. Prashant unka peechha kar raha tha. Ant men woh parking men aa gaye. Larke ke pas motorcycle thi. Woh dono uspar baithakar chale gaye.

Agle char dino tak Prashant is tarah ke paarkon men ghoomta raha aur usne kuchh isi tarah ki aur baten dekheen lekin usko apne liye koi sathi nahin mila. Chhathhe din usko ek 25 sal ka larka ek park men akele baithe hue deekha. Larka neeche ghar ka lag raha tha aur Prashant ke layak nahin tha. Lekin Prashant ke sharir men to vasna ki aag dhadhak rahi thi. Usne lagbhag 12 varshon se kisi purush ka sparsh tak nahin kiya tha. Prashant mauka chookne ke liye taiyar nahin tha. Prashant larke ko door se dekhta raha. Jab bahut der tak koi us larke ke pas nahin aya to Prashant us larke ke aur nazdeek chala gaya aur uske charon taraf mandarane laga. Tab us larke ne bhi Prashant ko dekh liya. Usne Prashant ko ishare se apne pas bulaya aur apne pas baithane ke liye kaha. Prashant ne uski aggya ka palan kiya. Woh larka Prashant se baten karne laga. Prashant ko apne mitra se bichhare hue itna samay beet chuka tha ki yeh uske liye lagbhag ek naye anubhav ki tarah tha. Uska poora sharir uttejana se kaanp raha tha. Woh us larke ki kisi bhi baat ka jawab nahin de paa raha tha. Uski dasha bilkul waisi thi jo suhag raat men dulhan ki hoti hai. Jab us larke ne dekha ki Prashant uski kisi bhi baat ka jawab nahin de raha hai to usne kaha - Are, bolte nahin! Dhire-dhire Prashant apna sir hila kar uski baaton ka jawab dene laga aur thori der ke baad woh bhi us larke se baaten karane laga. Us larke ne Prashant ko bataya ki woh apne ghar men akela rahata hai aur agar woh chahe to raat uske saath gujar sakata hai.

Woh larka ek motor mechanic tha. Woh kisi gandi si colony men rahata tha. Prashant sochane laga ki kya use us larke ke sathh jana chahiye? Kya use ab aise logon ka saath lena parega? Woh kuchh nirnaya nahin le pa raha tha. Ant men usne us larke se kaha ki woh abhi uske saath nahin chal payega kyonki use kuchh kam hai lekin usne us larke se uska nam tatha us garage ka phone number le liya jahan woh kam karta tha.

Agle do din tak Prashant ke dil aur dimag men barabar larai chalti rahi. Uska mastishk kahata tha ki Prashant aise gande larke ke saath sharirik sambandh banane ki baat soch bhi kaise sakta hai. Lekin uska dil kahata tha ki itne lambe samay tak bina kisi purush ka sparsh kiye rahana sambhav nahin. Yeh larka bhi 6 din tak koshish karne ke baad mila hai. Aur phir do-ek din men uski patni wapas aa jayegi aur phir use kabhi mauka nahin milega. Akhirkar Prashant ke hridaya ki vijay hui. Prashant ne us larke ko phone kiya aur apne ghar ane ko kaha.

Prashant ko kya ho gaya hai? Woh kya karne ja raha hai? Aasman, too gir kyon nahin parata? Dharati, too phat kyon nahin jati? Are koi Prashant ko bachao. Prashant, tum wohi ho na jisne ek din atyant kathhin paristhitiyon men bari hoshiyari se apni kaksha ke do larkon se apne sharir ki raksha ki thi. Woh larke bare gharon ke the. Woh engineer banane wale the. Phir bhi tumne unke sathh aisa karna theek nahin samajha. Aaj tumhen kya ho gaya hai, Prashant? He Ishwar, Prashant ki raksha kar.

Lekin koi Prashant ki sahayata ke liye nahin aya. Ishwar ne uski koi madad nahin ki. Aasman apni jagah par kayam rahaa. Dharati nahin phati. Aur Prashant ne apna sharir ganda kar liya. Iktalis varsha ki ayu men Prashant ne apne sharir ki pavitrata nasht kar di, ek aise vyakti ke hathon jo adhik se adhik uska naukar hone ke layak tha. Usne samaj men apne sthan ka khyal nahin kiya. Usne apni oonchi shiksha ka bhi dhyan nahin rakha. Kaun ummeed kar sakta tha ki Prashant itna neeche gir jayega.

Aur ek bar girane ke bad Prashant phir kabhi sambhal nahin paya. Woh roz us larke ko apne ghar bulane laga jab tak uski patni laut nahin ayi. Prashant uske baad bhi nahin ruka. Woh us motor mechanic ki gandi colony ke gande ghar men jane laga. Aur us larke se use is tarah ke kai aur larkon ka bhi patm mil gaya. Ab Prashant niyamit roop se aisa karne laga. Jab kabhi bhi use samay milta hai woh un parkon men jata hai aur aise logon ko khojata hai.

Kuchh samaya pahale Prashant Internet par bhi is tarah ke logon ko khojane laga tha. Internet par sab achche gharon ke aur parhe-likhe log milte hain. Lekin Internet par doosra khatara hai. Milne se pahale aise doston ke saath kuchh samaya tak e-mail dwara patra byabhar karna parta hai. Yeh chitthhiyan pyar bhari hoti hain. Dheere-dheere aapas men pyar hone lagata hai. Prashant ko Internet par saat-aathh andekhe-anjane larkon se ek saath pyar ho gaya. Aur phir woh dard se buri tarah tarapne laga. Uske pichhale zakhma, jo ek din uske dost ne usko diye the, woh sab hare ho gaye. Isliye Prashant Internet ko pasand nahin karata. Usne ab Internet par sathiyon ki talash band kar di hai. Prashant ko samajh aa gaya hai ki use idhar-udhar muh markar apne sharir ki aag bujha lene ka hak to hai, lekin pyar karne ka koi hak nahin. Isliye gande logon ke saath sambandh rakhana hi theek hai jinse pyar nahin ho sakta.

Prashant janta hai ki jo woh kar raha hai wo galat hai. Uske dil aur dimag men hamsha larai chalti rahati hai. Kabhi kabhi uska dimag jeet jata hai. Aur tab woh idhar-udhar bhatakna band kar deta hai. Lekin karib 6 mahine men uske sharir ki aag phir se dhadhakne lagati hai aur woh phir unhin parkon men jana shuroo kar deta hai. Uske do vyaktitwa hain. Prashant ke do tukre ho gaye hain.

Prashant ko jiwan ki koi ichchha nahin. Woh mar jana chahata hai. Lekin woh atmhatya nahin kar sakta. Uske bachchon ka kya hoga? Us stri ka kya hoga jo uske saath rahati hai aur duniya jise uski patni kahati hai? Kam se kam woh usko rahane ke liye ek chhat to de raha hai. Kam se kam woh usko samajik suraksha to deta hai. Kam se kam woh uski rozmarra ki rupayon-paison ki zarooraton ko to poora karata hai.

Prashant kyon apne jiwan se itna dukhi hai? Woh apne aapko ek vidhawa kyon nahin samajh leta? Vidhawaon ko bhi to koi pyar ya sharirik sukh nahin milta. Prashant kahata hai - Ek vidhawa ko kuchh chhupana nahin parata. Logon ko uski dikkaton ka pata hota hai aur woh usse sahanubhooti rakhate hain. Kya main apni samasyayen kisi ko bata sakta hoon? Kya main apne doston ya rishtedaron se apni pareshaniyan kah sakta hoon? Apne sabse priya aur nazdiki logon se bhi apne poore vyaktitwa ko sare jiwan chhupa kar rakahne ka dard itna gahara hai ki vidhawa se meri tulana nahin ho sakati.

Ab Prashant karib 50 varsha ka ho gaya hai. Woh dekhane men ek aam adami ki tarah hi lagata hai lekin woh ek jinda lash se addhik aur kuch nahin. Woh ek shama ki tarah dhire-dhire jal aur pighal raha hai. Lekin abhi uske andar bahut mom (vax) baki hai. Uska ant abhi kahin nazar nahin ata. Samlaingikata ke alawa uski koi aisi aadat nahin jisko galat kaha ja sake. Uski ruchiyan bahut achchhi hain. Usko sirf oonche darze ka sahitya hi pasand ata hai. Samaj men barhati hui ashleelata se usko dukh hota hai. Woh cinema aur TV pasand nahin karta kyonki unka star atyant gira hua hai. Usne jiwan men kabhi paan, biri, cigarette ko haath tak nahin lagaya. Sharaab bhi woh jiwan men sirf ek bar peene laga tha jab uske bahut bure din the. Woh ghar ka bana hua khana hi pasand karata hai. Woh poori tarah shakahari hai. Uski sehat achchhi hai. Uske jiwan ka ant hone men kam se kam 25-30 sal aur lagenge. Jaise-jaise uski umar barh rahi hai, kisi purush ka pyar pane ki uski ichchha ghatane ki vajay barhati ja rahi hai. Woh kisi ek vyakti ke saath rahana chahta hai. Usko iddhar-udhar bhatakna achchha nahin lagata. Isse usko santosh nahin hota. Isse uske sharir ki pyas thori der ke liye bujh jati hai lekin uska man aur uski atma hamesha ki tarah vaise ke vaise pyase hain. Woh kisi aise purush ke saath sambandh rakhana chahata hai jisko woh pyar karata ho, jo usko pyar karata ho, jo uske saath usi ke ghar men rahata ho, jo uske saath khata-peeta ho, jo uske saath usi ke bistar par sota ho, aur jo usko kabhi akela na chhore. Lekin aisa nahin ho sakta. Samaj ise kabhi bardasht nahin karega. Uske apne tarike hain. Prashant ko apna jiwan apni tarah se jeene ka koi hak nahin. Chahe isse aur kisi ka koi nuksan hota ho ya nahin. Agar sab log is tarah se apni manmarji karate rahe to samaj ka kya hoga? Isse to samaj poori tarah bigar jayega. Iski ijajat nahin di ja sakti. Akhabaron men patramitrata ke naam par yaun sambandhon ke liye auraton aur larkiyon ko dhoondhane walon ke hazaron vigyapan rozana chhapte hain. Kya unse samaj nahin bigarta? Malish karane walon ke naam par Samlaingikon ko larke muhayya (make available, its an Urdu word) karane wale health klabon (plural of club in Hindi style) ke viggyapan khule aam dikhai dete hain. Kya isse samaj ke oopar koi asar nahin hota? Nahin, yeh sab to chalta hi rahata hai. Aisi chhoti-chhoti baaton par aapatti (objection) karna sankuchit vicharon ki nishani hai. Kya Prashant bhi apna jiwan saathi chunne ke liye akhbar men viggyapan de sakta hai? Kabhi nahin. Aisa karna galat hai. Yeh anaitik hai. Yeh Prakriti ke niyamon ke viruddha hai.

Jab hamne Prashant ko apne daftar men bulaya aur usse uske pichhale jiwan ke bare men baatcheet ki to woh bachchon ki tarah bilakh-bilakh kar rone laga aur hamare liye use chupana mushkil ho gaya. Rote-rote usne kaha - Mujhe kitana garv mahsoos hota tha jab mujhase ulti-sidhi baat karane wale larkon ko main buri tarah phatkarata tha. Main ek Sita ki tarah rahana chahata thi lekin is samaj ne mujhe veshya bana diya. Main jis tarah apne sharir ki bhookh mitane ki koshish karata phirata hoon, mujhe kisi bhi din AIDS ho jayega. Aur mujhase meri patni ko bhi yeh rog lag jayega. Agar ham dono mar gaye to hamare bachchon ka kya hoga?

Prashant age kahata hai - Aaj is mamooli sarkari naukari par hi maine santosh kar liya hai. Aur kuchh karane, aage barhane ki meri sab ichchhayen mar gayi hain. Mere vyaktitwa ka poora vikas nahin ho paya. Agar mere mitra ke saath meri shaadi ho sakti to ham saath milkar koi bari company kholte athawa koi udyog sthapit karate. Hamari apni bhi tarakki hoti aur ham desh ki unnati men bhi haath bantate. Lekin samaj ko yeh sab manzoor nahin tha. Usko to meri ichchhaon aur abhilashaon ko kuchalne aur mera tatha mere saath meri patni aur mere bachchon ka jiwan barbad kar dene men adhik ruchi thi. Kya bigar jata is samaj ka agar yeh mujhe apne dost ke saath rahane deta? Ham koi apradh nahin karate, auraton ke saath balatkar nahin karate, aur to aur ham bachche paida karke is desh ki jansankhya bhi nahin barhate. Maine bina kisi karan ke is dharati ki abadi men do log aur jor diye. Agar hamen bachchon ka shauk hota to ham anaath bachchon ko god lekar unhen ek ghar dete.

woh jawan larkon ke mata-pitaon ko salah deta hai - Agar aapka larka bina kisi karan barabar shaadi ke liye mana karata rahata ho to usse poochhiye ki kya woh samlaingik hai, aur agar uska jawab haan men hai to yeh samay hai jab use aap ke poore pyar aur dekhbhal ki zaroorat hai, us samay se bhi jyada jab woh ek shishu tha. Usse grina na karen. Usmen koi burai nahin hai. Use koi bimari nahin hai. Woh ekdam samanya hai. Woh ek achchha larka hai. Sirf woh doosron se alag hai. Use shaadi ke liye bilkul mazboor na karen. Shaadi kar dene se woh vishamlangik nahin ho jayega. Usse poochiye ki uska sabse achchha dost kuan hai. Woh kiske saath jiwan bitana pasand karega. Aur jab woh aapko bata de to uske dost ke mata-pita se baat karke un dono ke liye ek alag ghar ka prabandha kar den, agar ho sake to kisi doosre shahar men jahan aapka koi saga-sambandhi na rahata ho. Aur un dono ko aashirwad dena na bhoolen, jaise ki aap apne bete-bahoo ko dete. Yeh bilkul na sochen ki woh dono aapas men koi ganda kaam karne wale hain kyoki aapka beta aur bahoo bhi yahi karate. Agar aap is samay apna kartavya poora karane men chook gaye to aap ka dulara beta, aap ke kaleje ka tukra, aap ki ankhon ka tara jiwan bhar jinda aag men jalega. Uska hal sati se bhi bura hoga. Sati men ek bar jalate the, usko sara jiwan jalna parega.

Prashant kahata hai - Mujhe shaadi karni pari kyonki mera koi dost nahin tha aur milne ki koi ummeed bhi nahin thi. Agar mera dost mujhe is duniya men akela na chhor deta to main kabhi bhi shaadi ke liye razi na hota chahe main uske saath rah pata ya nahin. Jab main shaadi ke liye raazi hua to mere hridaya men bahut sari mili-juli bhavnayen theen. Mere mata-pita aur doosre log mujhe itne samay se pareshan kar rahe the ki mera dil vidroh kar uthha. Woh chillane laga - Are moorkhon, tum kyon nahin samajh sakte ki mujhe koi pareshani hai? Theek hai, agar tum yeh chahate ho to yahi sahi. Agar tum chahate ho ki main ek larki ka jiwan barbad kar doon to aisa hi hoone do. Main bhool gaya ki vidroh karke main sirf apna, us larki ka jiske saath meri shaadi hoti aur apne hone wale bachchon ka nuksan kar raha hoon. Aur kisi ka isse kuchh nahin bigra. Mere mata-pita to araam se swarg sidhar gaye aur jo apne aap ko mera hitaishi samajhate the unhone murkar bhi nahin dekha ki ham kaisi jindagi gujaar rahe hain. Ab main bari shiddat (urdu word) ke saath mahsoos karta hoon ki vidrooh karne aur galat kadam uthhane ki vajay mujhe apni vastavikta apne mata-pita ko bata deni chahiye thi. Thore sahas se kaam lekar mujhe apne pitaji ko ek chitthi likhkar bata dena chahiye tha agar seedhe baat karna sambhav nahin tha. Isse bahut si samasyayen hal ho jateen.

Prashant apne jaise larkon ko salah deta hai - Kabhi samaj ke dawab ke aage jhukkar shaadi na karo. Tumhare jiwan par sirf tumhara hak hai kisi aur ka nahin. Tumhare mata-pita ka bhi nahin. Samaj to tumhara gala kaat dalega agar tumne uski baat mani to. Meri barbad jindagi se sabak lo. Apne saath aisa kabhi na hone do jo maine hone diya. Aajkal Internet ke maadhyam se tumko apne layak jiwan saathi asani se mil sakata hai. Kuchh patrikaon men bhi samlaingikon ke aise viggyapan chhapane lage hain jinmen woh mitrata ke liye saathi dhoondhate hain. Jyadatar larke kuchh samay ke sharirik sambandhon ke liye hi viggyapan dete hain lekin inheen viggyapanon ko vaivahik viggyapan ki tarah istemaal kiya ja sakta hai. Apne layak ek larka dhoondh lo aur uske sath jiwan bhar raho. Apne liye alag ghar le lo. Apne mata-pita ke saath mat raho. Aur bahut sawdhani se raho. Samaj tumhare khilaph hai. Sari duniya tumhare khilaph hai. Ishhwar bhi tumhare khilaph hai. Thora sa jhagra ho jane se apne saathi ko chhor dena tumhare liye bahut asaan hai kyonki samaj ka tumhare oo par koi bandhan nahin hai. Isliye apne liye bandhan tumhen khud taiyar karna hai. Apne aapko apne saathi ke saath doosre tarikon se bandho. Aarthik roop se usko apne saath bandh lo. Bari-bari cheezen jaise makan, gari adi milkar kharido. Bare nivesh saath-saath karo. Aur rupaye-paise ka koi hisaab mat rakho. Aur apne dost ko bahut pyar karo. Jo kuch tumhare pas hai sab usko do. Kabhi bhi uske saath bewafaai mat karo. Anek logon ke saath sharirik sambandhon ke peechhe mat dauro. Aisa sukh tumko bahut mil jayega. Lekin sachcha pyar kahin nahin milega. Woh sirf tumhen tumhara jiwan saathi hi de sakta hai.

Prashant ka kahana hai - Samlaingik hamare samaj men sabse ganda shabd hai. Usko nali men rengane wale gande keeron se bhi adhik ganda samajha jata hai. Log uske oo par hansate hain, uska majak urate hain, usse beintaha (unlimited, Urdu word) nafrat karate hain, aur usko gandi se gandi galiyan dete hain. Woh logon ke liye achhoot hai. Kyon? Kya sirf isliye ki woh doosron se alag hai? Athawa isliye ki us jaise logon ki sankhya bahut kam hai (I do not want to use the word alpa-sankhyak here because in India it is normally used for religious minorities)? Ya isliye ki woh sharirik sambandhon ke liye logon ko dhoondhata phirata hai? Lekin bahut se aam log bhi aisa karate hain. Agar ek samlaingik aisa karata hai to isliye ki yeh uski mazbori hai. Uske paas doosra raasta nahin. Lekin vishamlangik to sirf indriyon ka adhik se adhik mazaa lootne ke liye aisa karate hain. Is par bhi unko kisi vishesh asamman ki drishti se nahin dekha jata. Koi unse nafrat nahin karata. Woh kisi ke liye achhoot nahin hain. Prashant ek aise vivahit vyakti ko janata hai jiske do bachche hain aur jo 45 varsh ki ayu men 35 se adhik striyon ke saath sharirik sambandh sthapit kar chuka hai aur jo bare garv ke saath apne mitron ke beech iska ailan karta phirta hai. Uska koi apman nahin karata. Usse koi nafrat nahin karata. Log usse samanya roop se hi baat karate hain jabaki sabko uski is adat ka pata hai. Yahan tak ki Prashant bhi usse samanya roop se hi baat karata hai kyonki woh Prashant ka samman karata hai aur Prashant uske vyaktigat jiwan men jhankane ka koi karan nahin paata.

Prashant ki logon ko salah hai - Jab kabhi aap kisi samlaingik ko dekhen to usse ghrina karane ya uska mazak urane ki vajay aap sochen ki woh kitna abhaga hai. Woh kitni mushkil se apna jiwan bita raha hoga. Ishwar ne usse woh adhikar bhi chheen rakha hai jo sab manushyon, janwaron, pakshiyon, yahan tak ki keeron ko bhi prapt hai. Jo mujhe roz bina kisi prayatn ke milta hai uske liye use hafton aur mahinon tak shahar ke parkon aur aisi doosri jagahon par bhatakna parata hai. Aur phir bhi use sirf do pal ka sharirik sukh hi naseeb hota hai. Aur jisse use yeh sukh milta hai use woh pyar nahin kar sakta. Woh kisi se pyar nahin kar sakta. Yeh uska kitna bara durbhagya hai. Mujhe uske saath sahanubhooti aur samman se baat karani chahiye. Ham sabko milkar pratiggya karni chahiye ki ham Ishwar ki is galti ko sudharenge. Ham usko bhi vivah ka adhikar denge. Usko bhi insanon ki tarah rahane ka hak hai. Samlaingik kisi se kam nahin hain. Woh bhi parhe-likhe log hain. Woh bhi samaj ke liye kam karate hain aur desh ki tarakki men barabar ka haath bantaaten hain. Samaj unki mehnat ka poora phayada uthhata hai. Lekin woh badle men unko kya deta hai - apmaan, galiyaan, ghrina, aansoo, dukh aur dard. Ham itne swarthi kaise ho sakte hain?

Prashant kahata hai - Agar phir bhi aa pko lagata hai ki samlaingik gande log hain to unko jinda na rakhiye, unko maar daliye. Unke liye aisi jagahon ki vyawastha kariye jahan unko koi teekha zahar diya jata ho jisse turant unki maut ho jaye. Ya to unhen unka hak deejiye ya unhen mar daliye. Iske alaawa doosra rasta nahin hai.

Prashant chetawani deta hai - Mera bhaggya achchha tha ki mejhe apni kishoravastha ke samaapta hote hi ek aisa saathi mil gaya jiske saath main 11 varsh tak raha. Mere jaise adhiktar log itne bhaggyawan nahin hote. Vayask hote hi woh anekon vyaktiyon ke saath sharirik sambandh sthapit karna shuroo kar dete hain aur aisa unki mrityu tak chalta rahata hai. Ek samlaingik jiwan men sainkaron logon ke saath sambandh sthapit karata hai. Aur woh koi sawdhani nahin baratate hain kyonki condom unke liye nahin bana hai. Woh phat jata hai. Iske alaawa unke liye mukh-maithun bahut mahatwapoorna hai aur ismen condom ka istemal nahin ho sakta. Rubber ko koi bhi vyakti apne muh (mouth) ke andar nahin le sakta. Aajkal Internet tatha kuchh patrikaon ki madad se unke liye saathi dhoondhana bahut assan ho gaya hai. Bhavishya men AIDS aur doosre yaun rog bahut tezi ke saath phailenge aur auraton ko bhi apni chapet men le lenge kyonki harek samlaingik ki shaadi antatah ho hi jati hai. Is prakar vishamlaingik bhi in beemariyon ki chapet men aa jayenge. Log nahin samajh rahe hain ki woh ek jwalamukhi ke oopar baithhe hue hain.

Prashant ka kahana hai - Samlaingikta ke virodh men sirf ek tark hai ki isse bachche paida nahin ho sakte. Lekin kya hamko aur bachchon ki zaroorat hai? Aaj manavata ki sabse bari samasya kya hai? Had se jyada abadi barha kar vishamlangikon ne is dharati par tabahi macha rakhi hai. Kisi bhi samaj men samlaingik sirf do pratishat hote hain. Agar do pratishat log bachche paida na karen to isse kitna bara nuksaan ho jayega? Aur agar sach men hi kisi samaya hamen aur bachchon ki avashyakta parati hai to samlaingik apna veerya daan de sakte hain aur koi bhi zarooratmand stri kritrim garbhadhan ke dwara santaan paida kar sakti hai. Chikitsa vigyan pragati kar raha hai. Bachche paida karane ke aur bahut tarike khoje jane wale hain. Human cloning ki baat to chal hi rahi hai. Yahan tak sunne men aya hai ki purush bhi bachche paida kar sakte hain aur doodh bhi pila sakte hain. Sirf bachche paida karane ke liye samlaingiko aur vishamlangikon ki shaadi karwakar unke jiwan ko barbad kar dena kahan ki buddhimani hai?

Ab Prashant ne apni samasyaon ka ek samadhan socha hai. Uske paas shahar ki ek achchhi colony men ek ghar hai jiski keemat karib chalees lakh rupaye hogi. Uske paas karib bees lakh rupaya bankon (plural of bank, Hindi style) adi men jama hai. Yeh uske jiwan ki sari jamapoonji hai. Uske paas ek car tatha ghar ki zaroorat ki aur sabhi cheezen bhi hain. Is sab sampatti ke badale kya use koi aisa vyakti nahin mil sakta jo uski patni se shaadi karke uske bachchon ko baap ka pyar de sake. Uski patni apni ayu ke hisab se bahut sundar hai aur uske bachche bare pyare hain. Sahi umar ka koi bhi vyakti Prashant ko sweekar hoga vasharte ki voh uski patni ko pyar kar sake. Prashant apni sampatti ko apni patni tatha us vyakti ke beech barabar-barabar baant dega. Phir woh kisi door ke shahar jakar nakli nam se kisi hotel men thhahar jayega aur neend ki goliyan khakar apne is ghrinit jiwan ka ant kar lega. Kisi ko pata nahin chalega ki marane wala kaun tha aur usne aisa kadam kyon uthhaya. Ek aisi galati jo Iswar ne ki, jisko samaj nahin sudhar saka, Prashant theek karane ke liye taiyar hai. Usne Internet par apni patni ka sara vivran rakh diya hai aur jawabon ka intazar kar raha hai.

Is sansar men uske jaise lakhon-karoron Prashant hain. Aur bahut sare aur janmm lenge.

Kitne aur Prashanton ko teri apni pasand, jo toone doosron par thop rakhi hai, ki balivedi par apna jiwan kurban karana parega isse pahale ki teri neend khule?

2 comments:

  1. hi prashant sir
    maine apki love story padi
    agar ye apki story vakai sach hai to please mujhe e mail karke jaroor batana
    to shyad main apna dard tumse kuch kah sakunga.kyonki ek samlaingik ka dard samlaingik hi jaan sakta hai.
    age to kuch nahin likhunga.

    ReplyDelete
    Replies
    1. Dhanyawad aapki comment ke liye. Yeh story prashant ji ki hai jo publishing ke liye kisi pathak dwaara bheji gayi thi.Prashant ji ab kahan hain kisi ko nahi maaloom.

      agar aap mujhse sampark karna chahein to jaroor likhein kyunki hamari zindagi bhi prashant ji ki zindagi ka pratiroop hai.

      Delete

Share It